2 мыңға жуық бала уланды, 7 күдікті қамауға алынды

Ташкент облысындағы мемлекеттік балабақшаларда жаппай улану дерегі тіркеліп, 2 мыңға жуық бала дәрігер көмегіне жүгінді.

Өзбекстанның Санитарлық-эпидемиологиялық салауаттылық және қоғамдық денсаулық комитеті төрағасының бірінші орынбасары Нурмат Атабековтің айтуынша, уланған балалардың 182-сі әлі де ауруханаларда ем қабылдап жатыр. Мамандар бүлдіршіндердің жағдайы біртіндеп жақсарып келе жатқанын мәлімдеді.

Айта кетейік, 24 қыркүйекте Ташкент облысындағы бірнеше мемлекеттік балабақшада сүт өнімдерінен улану фактісі анықталған. Нәтижесінде 960-тан астам бала ауруханаға жатқызылып, жалпы саны 2 мыңға жуық ата-ана медициналық көмекке жүгінген.

"Балалардың ешқайсысы ауыр хәлде емес. Емдеу жұмыстары мемлекет бақылауында және оң нәтиже беріп жатыр", – деді Нурмат Атабеков.

Қазіргі уақытта оқиға бойынша қылмыстық іс қозғалып, тергеу амалдары жүргізілуде. Іске қатысы бар деген күдікпен 7 адам қамауға алынды. Олардың үшеуі – сүт өнімдерін өндіруші компания қызметкерлері, қалған төртеуі – балабақшаларға азық-түлік жеткізетін фирмалардың өкілдері.