Қазақстанда әйелдердің зейнет жасы ұлғаймақ

Мәжіліс дәлізінде журналистерге сұхбат берген еңбек және халықты әлеуметтік қорғау вице-министрі Виктория Шегай Қазақстандағы әйелдердің зейнет жасы туралы пікір білдірді.

Вице-министрдің айтуынша, әйелдердің зейнет жасын арттыру процесі жалғасады. Ол бұл шараның бұрын уақытша тоқтатылғанын еске салып өтті.

"Қолданыстағы заңнамаға сай, әйелдердің зейнет жасы ерлермен теңестіріледі, яғни біртіндеп 63 жасқа дейін көтеріледі", – деді Виктория Шегай.

Оның сөзінше, бұл өзгеріс болашақ зейнетақы төлемдерінің мөлшеріне де әсер етеді — азаматтардың жинақтаушы зейнетақы жүйесіне неғұрлым ұзақ қатысуы олардың зейнетақысының көлемін арттырады.

Сонымен қатар, елде егде жастағы әйелдерді жұмысқа орналастыру тетіктері күшейтіліп жатыр. "Күміс жас" бағдарламасы аясында жұмыс берушілер тәжірибелі қызметкерлерді жұмысқа қабылдаған жағдайда олардың жалақысының бір бөлігі мемлекет тарапынан субсидияланады.

Қазір Қазақстанда ер адамдар 63 жаста, әйелдер 61 жаста зейнетке шыға алады. Әйелдердің зейнет жасы 2027 жылдың соңына дейін өзгеріссіз қалады, ал 2028 жылдан бастап ол кезең-кезеңмен өсіп, 2031 жылы 63 жасқа дейін жетеді. Осылайша ерлер мен әйелдер үшін зейнеткерлік жас теңестіріледі.