Раменді шамадан тыс жеудің салдары қандай?

Рамен – Жапония ғана емес, бүкіл әлемде танымал тағам. Алайда бұл лапшаны шамадан тыс жеу денсаулыққа айтарлықтай зиян келтіруі мүмкін. Бұл туралы ilmek.kz "Доктор Питер" порталына сілтеме жасап хабарлайды.

Жапон ғалымдары жүргізген зерттеу нәтижелері раменді жиі тұтыну мезгілсіз өлім қаупін арттыратынын көрсетті. Зерттеу Sciencedirect журналында жарияланған.

Зерттеу қалай жүргізілді?

• Зерттеуге 40 жастан асқан 6 700-ден астам жапон азаматы қатысты.

• Қатысушылардың үштен бірі – ер адамдар.

• Олар сауалнама толтырып, денсаулығы, өмір салты және раменді қаншалықты жиі тұтынатыны туралы ақпарат берген.

Нәтижелер:

• Қатысушылардың 46,7%-і раменді айына 1–3 рет жейтінін айтқан;

• 27%-і – аптасына 1–2 рет;

• 7,4%-і – аптасына 3 реттен жиі тұтынады.

Зерттеу бірнеше жылға созылған. Соңында келесі жағдайларда ерте өлім қаупінің жоғары екені анықталған:

• Аптасына 3 реттен жиі рамен жейтіндерде;

• Сорпаның жартысынан көбін ішетіндерде (тұз мөлшері өте жоғары);

• Раменді алкогольмен бірге тұтынатындарда.

Неліктен зиян?

Ғалымдардың айтуынша, басты себеп – рамен құрамындағы шамадан тыс тұз мөлшері. Тұздың көп болуы:

• Инсульт;

• Жүрек-қан тамырлары аурулары;

• Асқазан обырына әкелуі мүмкін.

"Тұзды шамадан тыс тұтыну ерте өлімге әкелетін созылмалы ауруларға себеп болады. Раменде тұз мөлшері жоғары болғандықтан, оны жиі жеу денсаулыққа қауіпті", – делінген зерттеуде.

Сондай-ақ, раменді жиі жейтіндер арасында темекі шегетін, алкоголь ішетін, дене салмағы жоғары, гипертония немесе қант диабетімен ауыратындар жиі кездескен.