Несиесі бар азаматтар атаулы әлеуметтік көмектен қағыла ма? Министрлік түсінік берді

Еңбек және халықты әлеуметтік қорғау министрі Светлана Жақыпова несиесі бар азаматтарға АӘК тағайындау тәртібіне қатысты ұсынылып отырған жаңа өзгерістерді түсіндірді.

Министрдің айтуынша, қазіргі уақытта бұл бастама «Ашық НҚА» порталында қоғамдық талқылауға шығарылған. Құжатта несиесі бар отбасыларға атаулы әлеуметтік көмекті төлеу тәртібін қайта қарау ұсынылған.

Светлана Жақыпованың сөзінше, АӘК – азаматтардың қарызын жабуға арналған көмек емес. Сондықтан көмек тағайындау кезінде отбасының несиеге жұмсалатын шығындары есепке алынатын болады.

"Мысалы, үш адамнан тұратын отбасы 3 миллион теңгеге несие алған жағдайда, олардың ай сайынғы төлемі 300 мың теңгеден айналады. Мұндай жағдайда отбасылық табыс кедейлік шегінен жоғары деп есептеліп, АӘК тағайындалмайды. Ал егер несие көлемі аз – мысалы 300 мың теңге болса, ай сайынғы төлем де төмен болады, бұл табыстың кедейлік шегінен төмен екенін көрсетіп, АӘК алуға мүмкіндік береді", – деді министр.

Министрдің айтуынша, ұсынылып отырған бұл өзгерістер ипотекалық несиелерге қатысты емес. Сонымен қатар, бұл нормалар әзірге заңды күшіне енбеген.