«Кесарево үшін ақша талап етті»: Жамбылда сәби өлімінен кейін тексеріс басталды

Жамбыл облысында жаңа туған нәрестенің өліміне қатысты тергеу жүргізіліп жатыр. Бала дүниеге келгеннен кейін бір сағаттан соң көз жұмған, ал анасы ауыр жағдайда қалды. Туыстары енді әділдік іздеп жүр. Олардың айтуынша, бұған дәрігерлер кінәлі, себебі медиктер әйелді бір аптаға жуық қинап, көмек көрсетуге асықпаған, тіпті ақша сұраған болуы мүмкін, деп хабарлайды ilmek.kz КТК арнасына сілтеме жасап.

Бұл жағдай 35 жастағы Гүлім Оразбаева үшін алтыншы баласының дүниеге келуімен байланысты үлкен трагедияға айналды. Әйел Тұрар Рысқұлов ауданынан Тараздағы облыстық перинаталдық орталыққа жеткізілген.

Туыстарының айтуынша, ірі нәресте болғандықтан оған кесар тілігін жасау қажет болған.

“Менің әпкемнің дені сау еді! Бала өте үлкен болды, УДЗ-де 4 келі 400 грамм деп көрсетті. Аудандық ауруханадағы дәрігерлер нәрестенің ірі екенін білген соң кесар тілігі үшін Таразға жіберді. Бірақ ол жақта әпкемді өздігінен босануға мәжбүрлеген”, — дейді әйелдің әпкесі Айгерім Оразбаева.

Туыстарының сөзінше, босанушыны босану залына тек ол дәрігерге ақша аударғаннан кейін ғана кіргізген. Алайда бір сағаттан кейін нәресте шетінеп, анасы жатыр жыртылуымен жансақтау бөліміне түскен. Кейін оған ота жасап, жатырын алып тастауға тура келген.

“Оны бірден отаға алу керек еді. Бейсенбіде алып келді, олар кейінге қалдырды, сосын демалыс. Кейін ол әпкесіне жазып, кесар тілігін жасау үшін 20 мың теңге сұрап жатқанын айтқан. Ақша үшін, түсінесіз бе?! Олар оны әбден қинады”, — дейді әйелдің күйеуі Ермұхан Әмреев.

Оның айтуынша, қайғылы жағдайдан кейін дәрігерлер 20 мың теңгені қайта қайтарған.

Оқиға бойынша тексеріс басталып, қылмыстық іс қозғалған.

“Заң бойынша мұндай мекемелердегі барлық қызмет тегін көрсетіледі. Ақша төлеудің қажеті болмаған. Қазір оқиғаға байланысты қызметтік тексеріс тағайындалды, деректер жиналып жатыр, тәуелсіз сарапшылар тартылды. Нәтижелері кейін хабарланады”, — деді Жамбыл облысы Денсаулық сақтау басқармасы басшысының орынбасары Ерік Мұсабаев.

Ведомство өкілдері отбасының жағдайын түсінетінін, алайда тексеріс аяқталғанша күту қажеттігін атап өтті. Ал марқұм сәбиінің туыстары бұл трагедияға қатысы бар барлық жауапты адамдарды жазалауды талап етіп отыр.