Жастар кеңістігі: Алматыда комьюнити-орталықтар желісі кеңеюде

Алматы – еліміздегі ең жас әрі қарқынды дамып келе жатқан қала. Бүгінде әрбір үшінші алматылық — 14 пен 35 жас аралығындағы жас азамат. Олардың жалпы саны 712 мыңнан асады. Бұл көрсеткіш тек статистика емес — бұл жастар қаланың әлеуметтік, мәдени және экономикалық дамуына белсенді үлес қосып отырғанын білдіреді.

Жаңа формат – жаңа мүмкіндіктер

Соңғы үш жылда Алматыда жастарды қолдауға бағытталған заманауи комьюнити-орталықтар желісі құрылып, барлық аудандарды қамтыды. Бұл – білім, жұмыспен қамту, кәсіптік бағдар, психологиялық және құқықтық көмек сынды қызметтерді біріктірген кешенді инфрақұрылым. Мұнда әр жас — өзін дамытып, қауымдастықтың белсенді мүшесіне айналуға мүмкіндік алады.

Қазіргі таңда қалада 11 комьюнити-орталық жұмыс істейді. Олар тек коворкинг немесе оқу залы емес — бұл жастарға арналған ашық әрі қауіпсіз орта. Әр орталықта тренингтер, мастер-класстар, шығармашылық және зияткерлік іс-шаралар, еркін форматтағы кездесулер ұйымдастырылады.

Жұмыспен қамту және мансаптық қолдау

Жүйелі қолдаудың маңызды бөлігі — Алматы қалалық мансап орталығы. Бұл жерде жоғары оқу орындары мен жұмыс берушілер бір алаңда тоғысады. 2025 жылдың басынан бері орталық арқылы 4 мыңнан астам жас жұмысқа орналасқан.

Сол кезең ішінде:

• 6,2 мың жас жұмыспен қамту бойынша кеңес алды;

• 3,9 мың адам нақты жұмыс тапты;

• 1 мыңнан астам жас психологиялық көмекке жүгінді;

• 1,3 мыңнан аса адам құқықтық кеңес алды.

Мұнда әр жас азаматпен жеке жұмыс жүргізіледі: бастапқы диагностика, даму бағытын анықтау, оқыту, менторлық қолдау және әрі қарай жұмысқа орналастыру секілді кезеңдер қарастырылған.

Комьюнити – белсенді жастар ортасы

Комьюнити-орталықтар — жастар бастамаларын қолдайтын тірі экожүйе. Әр орталық өз бағытына сай дамып келеді: бірі – білімге, бірі – кәсіпкерлікке, енді бірі – шығармашылыққа ден қойған. Бұл кеңістіктерде 2025 жылдың басынан бері 1 600-ден аса іс-шара өтіп, 380 мыңнан астам адам қамтылды.

Әлеуметтік желілер арқылы (Instagram, TikTok, Telegram және т.б.) 1,5 миллионнан астам жас онлайн форматта тартылды. Жастар экологиялық, мәдени, білім беру және волонтерлік жобаларға белсенді қатысып жүр. Әр орталық өз ауданының ерекшелігіне сай, шынайы комьюнити қалыптастырып келеді.

NEET-жастармен жұмыс

Оқымайтын, жұмыс істемейтін және оқуға тартылмаған NEET-санатындағы жастармен де жүйелі жұмыс жүргізілуде. Бұл топты қоғам өміріне тарту — Алматыдағы жастар саясатының басты басымдықтарының бірі.

Келешекке жол ашық

Жыл соңына дейін Алматыда тағы екі жаңа комьюнити-орталық ашу жоспарланып отыр. Жастар үшін бұл — тек кеңістік емес, жаңа мүмкіндіктерге жол ашатын, қолдау мен шабыт табатын орта.

Алматының комьюнити-орталықтары бүгінде еліміздегі ең табысты жастар жобасына айналды. Бұл – жастардың дамуына ғана емес, қаланың болашағына салынған инвестиция.