Елімізде халық саны қанша болды?

2025 жылдың қаңтарынан шілдесіне дейін елімізде халық саны 124,5 мың адамға (0,61%) артып, 1 тамыздағы жағдай бойынша 20 407 844 адамға жетті. Бұл туралы Ұлттық статистика бюросы хабарлады.

Бюро мәліметінше, халық санының арту қарқыны өткен жылдармен салыстырғанда баяулаған. Қазіргі уақытта ел халқының 12,9 миллионы қалада, ал 7,4 миллионы ауылдық жерлерде тұрады.

Халық тығыз орналасқан өңірлер қатарында Алматы қаласы (2,2 млн), Түркістан облысы (2,1 млн), Астана (1,5 млн), Алматы облысы (1,5 млн), Шымкент қаласы (1,2 млн), Жамбыл облысы (1,2 млн) және Қарағанды облысы (1,1 млн) бар.

2025 жылдың алғашқы жеті айында республика бойынша орташа өсім деңгейінен жоғары демографиялық өсім бес аймақта тіркелген: Астана, Шымкент, Алматы қалалары мен Алматы және Маңғыстау облыстары. Ал Ақтөбе, Атырау, Ақмола және Қызылорда облыстарында өсім орташа деңгейден төмен болған.

Елдің басқа өңірлерінде халық санының азаю үрдісі байқалады. Әсіресе Солтүстік Қазақстан, Абай және Ұлытау облыстарында бұл құбылыс айқын сезілген.

Солтүстік және Шығыс Қазақстан облыстарында табиғи кему тіркелген: бұл өңірлерде қайтыс болғандар саны туғандар санынан асып түскен. Қалған аймақтарда табиғи өсім сақталып отыр.