Қазақстанда алаяқтар балаларға қоңырау шалып, өзін мұғаліммін деп таныстыруда – министрлік ескерту жасады

Оқу-ағарту министрлігі мектеп оқушыларына қатысты алаяқтықтың жаңа тәсілі пайда болғанын ескертуде.

Алаяқтық схемасының сипаты

Жаңа оқу жылы басталғалы бері алаяқтар оқушыларға қоңырау шалып, өзін мұғалім немесе мектеп қызметкері ретінде таныстырады. Олар "электрон күнделікті жаңарту" сылтауымен баладан ұялы телефонға келген бір реттік SMS-кодты сұрайды.

Балалар бұны мектепке немесе ата-анасына көмектесу деп түсінуі мүмкін. Алайда, алаяқтар бұл кодты пайдаланып, "Электрон үкімет" жүйесіне, онлайн банкингке немесе туыстарының банк шоттарына заңсыз қол жеткізеді.

Ата-аналарға арналған ескерту және кеңес

Министрлік ата-аналарға балаларына мына маңызды ережелерді түсіндіруді ұсынады:

• SMS арқылы келген бір реттік кодты ешкімге бермеу;

• Өзін мұғалім немесе мектеп қызметкері ретінде таныстырған адамнан қоңырау келсе, бірден ата-анасына хабарлау;

• Күдікті сілтемелерге өтпеу, бейтаныс қосымшаларды жүктемеу.

Күдікті жағдайлар байқалса, дереу құқық қорғау органдарына немесе 111 байланыс орталығына хабарласу қажет.