Бишімбаевтың анасы 990 мың долларды қайдан алғанын түсіндірді

Бұрынғы ұлттық экономика министрі Қуандық Бишімбаевтың анасы Альмира Нұрлыбекова сотта 990 мың доллардың (шамамен 453 миллион теңге) қайдан келгенін айтып берді. Ол туысы Бекзат Кемелованы бұл ақшаны алдап алды деп айыптап отыр.

Сот отырысы барысында прокурор Нұрлыбековадан қаражаттың қайдан алынғанын нақтылады. Бишімбаевтың анасы бұл ақшаны көпжылдық кәсіпкерлік қызметінің арқасында жинағанын айтты.

Оның сөзінше, ол 1993 жылдан бастап бизнеспен айналысып, 2003 жылдан бері жеке кәсіпкер ретінде Қызылорда базарына кәмпит, мандарин және апельсин жеткізіп келген.

«Кейін Таразда мектеп, одан соң спа-салон аштым. Кейін ғимарат пен екі қабатты үйімді сатып, Әулие-Ата университетін аштым. 2007 жылы сол нысандардың бірін миллион долларға саттым», – деді Альмира Нұрлыбекова сотта.

Ол кейін Шымкент қаласына көшіп, бизнесін жалғастырғанын айтты: түлектерді жұмысшы мамандықтарына оқытумен айналысқан, консалтинг компаниясы мен тіс дәрігерлеріне арналған химиялық препарат шығаратын өндіріс ашқан.

«2017 жылы Сыбайлас жемқорлыққа қарсы қызмет біздің барлық ақшамыз бен мүлкімізді тексерді. Тексеру нәтижесінде барлығы адал еңбектен табылған деп қорытынды жасалды», – деді Нұрлыбекова.

Істің мән-жайы

Бұған дейін бұрынғы министрдің ата-анасы өздерінің туыстары – Қайрат пен Бекзат Кемеловтарды сотқа бергені хабарланған.

Бишімбаевтың анасы Бекзат Кемелованы шамамен 1 миллион доллар көлемінде алаяқтық жасады деп, ал оның жұбайын жала жапты деп айыптаған.

Бүгінгі сот отырысында прокурор айыптау актісін оқығаннан кейін судья Назгүл Бапақова айыпталушыдан тағылған айыппен келісетін-келіспейтінін сұрады. Бекзат Кемелова өз кінәсін мойындамай, айыптаумен келіспейтінін мәлімдеді.