1 сәуірден бастап бірінші сыныпқа құжат қабылдау басталады

1 сәуірден бастап 2026–2027 оқу жылына балаларды 1-сыныпқа қабылдау үшін құжаттар қабылдау басталады. Өтінішті 31 тамызға дейін электронды түрде egov.kz порталы арқылы беруге болады.

1-сыныпқа балалар 6 жастан бастап ата-анасының өтініші негізінде, дайындық деңгейіне қарамастан қабылданады. Биыл облыс мектептеріне шамамен 9 мыңға жуық бірінші сынып оқушысы келеді деп күтілуде.

Өтініш беру үшін қажетті құжаттар:
* ата-анасының немесе заңды өкілдерінің өтініші;
* №065-у және №052-2/у нысандарындағы медициналық анықтамалар;
* 3×4 өлшеміндегі 2 фото.

Ата-аналарға құжаттарды соңғы күндерге қалдырмай, алдын ала тапсыру ұсынылады. Себебі мектептердегі орын саны шектеулі, ал сұранысы жоғары мектептерде орындар қабылдау мерзімі аяқталмай тұрып толып қалуы мүмкін.

Құжаттар дүйсенбіден жұмаға дейін, демалыс және мереке күндерінен басқа уақытта қабылданады.

Сондай-ақ, бірінші сыныпқа қабылдау кезінде емтихандар мен тестілеулер толықтай алынып тасталғанын, оның ішінде инновациялық мектептерде де өткізілмейтінін еске саламыз.