Қазақстаннан Қытайға май өнімдерінің алғашқы ірі партиясы жөнелтілді

Шығыс Қазақстан облысынан Қытайдың Цзянсу провинциясына 156 тонна күнбағыс майы экспортталды, деп хабарлайды ilmek.kz

Ауыл шаруашылығы министрлігінің мәліметінше, жүк Нантонг қаласына арнайы флекстанкпен жабдықталған 40 футтық контейнерлер арқылы жеткізілуде. Бұл тасымал "ҚТЖ" ҰК" АҚ мен Майлы дақылдарды қайта өңдеушілердің ұлттық қауымдастығының қолдауымен жүзеге асырылған.

Экспорттаушы — қауымдастық мүшесі болып табылатын Altyn Shyghys май зауыты. Жүк Достық – Алашанькоу шекара өткелі арқылы, Қазақстан мен Қытай арасындағы негізгі сауда дәлізімен жөнелтілді.

Флекстанк — сұйық өнімдерді тасымалдауға арналған икемді резервуар, ол логистиканы оңтайландырып, шығынды азайтып, жеткізу уақытын қысқартады.

Бұл экспорт – 2025 жылғы маусым айында Чжэнчжоуда өткен сараптамалық кездесудің нәтижесінде "ҚТЖ" мен Қытай темір жолы (КЖД) компаниялары бірлесе іске асырып жатқан пилоттық жобаның бір бөлігі. Аталған жоба ITC, QazTrade, салалық министрліктер мен басқа да серіктестердің қатысуымен әзірленген 2026–2028 жылдарға арналған май және тоң май өнімдерін шетке шығару бойынша жол картасына енгізілген.

Басты мақсат — 2028 жылға дейін май өнімдері экспорты арқылы 1 млрд АҚШ долларынан астам табысқа қол жеткізу. Контейнерлік тасымалдар тек Қытайға ғана емес, сондай-ақ Таяу Шығыс (БАӘ, Катар, Кувейт, Сауд Арабиясы) пен Оңтүстік Кавказ (Әзербайжан, Армения) елдеріне де шығуға мүмкіндік береді.